意外"驚喜"

剛過去的星期六晚上去了孫燕姿的演唱會，不知何時開始聽她的歌、喜歡她的歌，也許是想當年有人將她的唱片放在我車上播放，久而久之令我愛上吧！

其實上年她係香港開演唱會已經想去聽，不過好快爆滿，錯過咗！今次再開，當然不可錯過！她係演唱會上真係施展渾身解數，她係台上與另外兩人表演鋼琴三重奏，唱出"我要的幸福"，真係好好聽呀！相繼地唱出風箏、不能和你在一起、遇見等等，佢把聲真係好正！

當晚其中一位嘅表演嘉賓真係一Ｄ都冇諗過係佢：劉華，嘩.......佢一出場我即刻當咗自己係去咗佢演唱會咁，真係"high"晒！當然華仔一出場，氣氛都好到不得了，將全場嘅氣氛推上另一個高潮！我真覺得自己好好彩，冇錯過咁精彩嘅演唱會之餘，仲見到我最鍾意嘅華仔，我即刻覺得自己賺晒！

小小EN 冇得出聲 ？

唉........今日好灰，返第三日A，精神已經好差，點知食完早餐之後冇幾耐就話女人個邊病房開"大龍鳳"即 CPR，誠徵我這個男人病房嘅 runner 幫手，一開始個病人已經冇 pluse ，於是我同另一位同事立即 bag 同埋做 cardiac massage，成個過程淨係得我同個位同事 bag 同搓，從來 冇人諗過 relief 我哋囉，搓完之後隻手好似唔係自己咁呀！個位 cubical I/C 真係完全幫到手囉.......我哋搓到如火如荼，佢竟然係度執床上面Ｄ垃圾，真係唔該晒囉！

事件仲未完架！個 case 十點幾 certify death，屋企人十二點前已經見完阿婆最後一面，個位同事竟然由得個遣體一直拖到拖咗成個幾鐘，到一點都唔"打包"，其他同事話佢今日唔知做咩做嘢做得好慢，好多 rountine 都冇幫手做，淨係攬住Ｄ牌板囉，而我剛剛餵完餐餵到一點三先有得 sit 吓，一坐低落張櫈咋，我哋個位位高權重嘅 APN 就叫我去"打包"，我有表達我嘅不滿架！不過我呢個小小EN 就算出聲 人哋都唔荒會驚！

過到去開工，個位同事仲同我講，等我嚟丫.......我心諗：把鬼，你有心做就一早做咗啦......當然，佢都只係講吓，之後完全冇 action 啦！我用咗唔夠十五分鐘就做咗啦！！忙得咁緊要？？你係咪怕"打包"呀？？咁呢行唔啱你喎！

等我下次學吓佢，吼佢返工嘅時候，整Ｄ嘢比佢做，等佢感受吓！！

"索"女？？

這兩天真係做咗 "索" 女，大家千祈唔好誤會，我唔係話自己靚咗，而係我個鼻係這兩天裏常常流鼻水，於是乎我這兩天就常常做 "索"鼻水這個動作，真係名符其實的 "索"女呀！連我同事都忍唔住要笑我！

今日的天氣已經暖番好多，起床都冇咁辛苦啦！

早一陣子翻看自己BB時代的照片，真係好得意呀！原來我有不少的兒時照片，真係要唔該我個二哥，係我細細個的時搵我去練習攝影呀！還有其中兩張相係大約一歲時影的出浴照添呀！

天氣寒冷

天氣寒冷，令到人都特別"懶"

懶到這幾天只想躲在被窩裏瞓，連去洗手間都唔想去，真係懶得好嚴重！昨日返晚堂祟拜，已經穿了羽絨，披上頸巾，還感到寒風刺骨，諗住返到教會會比較暖啦，誰知一樣的冷，完了祟拜，立即竄入地鐵站，暖得很呢！

剛剛看到 TVB 「勝在有心人」，一位女子甘願放棄高薪厚職，安逸舒適的生活，跑到大陸做義工，為到殘障的兒童奔波、服侍，甚至領養重殘的孩子作為自己的女兒，心裏覺得很感人，試問有幾多人是不會嫌棄殘疾的孩子，更何況那不是自己的親生骨肉呢？

大陸的人民，知識水平偏低，民智未開，加上生育政策等等的問題，令到棄嬰的問題嚴重，不要說是有殘障的孩子，甚或是正常的嬰孩也被遺棄於攝氏零度以下的街道，可想而知這個問題有幾嚴重。常常見到這些報導都覺得很心酸，為甚麼那些父母可以狠下心腸，棄置自己剛出生的骨肉於街上呢？真是很殘忍啊！其實這些問題一直都存在，只是中國政府並沒有正視這問題罷了！

看見這女子為了那些殘障兒童無私地付出的愛心、時間、金錢等等一切一切，真是令我自慚形穢呢！

倒數、發呆、撲空

我都有一段日子沒有更新這裏了，新的一年我第一次在這裏post 文章，讓我記敍一下過去幾天所發生的事啦！

31/12/05

返早，放工後返家"充電"，瞓瞓吓被電話嘈醒，原來同事特地致電給我，問我會否去她家中倒數，其實她之前已經問過我的，不過我未諗好咋，反正瞓醒後精神爽利，於是一口答應，不過，我同事的家遠得很.........位於香港仔呀，對於我這個九龍人來說真係好遙遠呢！淨係係天后搵個小巴站都搵咗5分鐘有多呀！我差Ｄ以為自己係路痴呀！
去到同事家認識了很多新朋友，其中有一位是以前很出名很出名的師姐呀！(不過係佢嘅情史咋)，佢而家做緊空姐架！當晚係倒數時，我哋仲開了一枝香賓慶祝，不過好難入口呀！都係紅酒好飲Ｄ！熱熱鬧鬧咁就過了這年的除夕夜啦！不過回家時已差不多凌晨二時啦！

1/1/06

返早堂崇拜，七點九起床，我雙眼差點掙不開...........一如以往，完咗崇拜後"湊仔"，本來想完了今個年度的事奉就休息一下，不過見到Ｄ小朋友又有Ｄ唔捨得佢哋，所以決定留多一年，每個月做一次，希望唔會太辛苦！ 朝早返崇拜之前，發現車燵唔着，電池耗盡，冇車揸，唯有搭的士，好貴！

3/1/06

原本想今天去申請 BNO ，怎知沒有帶齊文件，令我撲個空呢！去到金鐘咁遠，浪費了我的金錢和時間呢！還有申請BNO真是很貴呀，成一千元........有點兒"肉赤"！算吧，誰叫我的護照將要到期，而我又不想申請特區護照呢？(冇錯，我係歧視特區護照)

在此祝願各位新一年，身體健康，新年快樂！